എ.ഐ. ക്യാമറയെ പറ്റിക്കാനായി നമ്പര്പ്ലേറ്റുകള് മാസ്ക് ഉപയോഗിച്ച് മറച്ച മല്ലപ്പള്ളി സ്വദേശിയുടെ ഇരുചക്രവാഹനം മോട്ടോര് വാഹന വകുപ്പ് പിടികൂടി. പത്തനംതിട്ട മല്ലപ്പള്ളി കുന്നന്താനം സ്വദേശിയായ വിദ്യാര്ഥി ഉപയോഗിച്ചിരുന്ന ബൈക്കാണ് മോട്ടോര് വാഹനവകുപ്പിന്റെ എന്ഫോഴ്സ്മെന്റ് സംഘം പിടിച്ചെടുത്തത്. ഇയാളുടെ സുഹൃത്തായ മറ്റൊരു വിദ്യാര്ഥിയുടെ ബൈക്കും രൂപമാറ്റം വരുത്തിയതിന് പിടികൂടിയിട്ടുണ്ട്.
എ.ഐ. ക്യാമറയുടെ കണ്ണില്പ്പെടാതിരിക്കാന് ബൈക്കിന്റെ രണ്ട് നമ്പര്പ്ലേറ്റുകളും കറുത്ത മാസ്ക് ഉപയോഗിച്ചാണ് മറച്ചിരുന്നത്. ഇത് ശ്രദ്ധയില്പ്പെട്ട എന്ഫോഴ്സ്മെന്റ് സംഘം ബൈക്ക് പിടിച്ചെടുക്കുകയായിരുന്നു. ഇരുപതിനായിരം രൂപയോളം പിഴ ഈടാക്കുമെന്ന് അധികൃതര് അറിയിച്ചു.