പുന്നവേലി: അവധി ആഘോഷിക്കാൻ ജർമനിയിൽ നിന്നും നാട്ടിലെത്തിയ പ്രവാസി യുവാവ് കുഴഞ്ഞുവീണു മരിച്ചു. പുന്നവേലി സ്വദേശി ബിബിൻ തോമസ് (34) ആണ് അന്തരിച്ചത്. ബർലിനിലെ സ്വകാര്യ റസ്റ്ററന്റിൽ ജീവനക്കാരനായിരുന്ന ബിബിൻ, ഒരു മാസം മുൻപ് ജനിച്ച ഇളയ മകളെ കാണാനാണ് നാട്ടിലെത്തിയത്. ഹൃദയാഘാതമാണ് മരണകാരണമെന്നാണ് പ്രാഥമിക നിഗമനം.
കഴിഞ്ഞ ദിവസം വൈകിട്ട് മാമൂടുള്ള ഭാര്യവീട്ടിൽ വെച്ച് കുഴഞ്ഞുവീണ ബിബിനെ ഉടൻ തന്നെ തൊട്ടടുത്ത ആശുപത്രിയിൽ എത്തിച്ചുവെങ്കിലും ജീവൻ രക്ഷിക്കാനായില്ല. ഒൻപത് മാസം മുൻപാണ് ബിബിൻ ജോലി ആവശ്യത്തിനായി ജർമനിയിലേക്ക് പോയത്. രണ്ടാമത്തെ കുഞ്ഞ് ജനിച്ചതിനെത്തുടർന്ന് ഒരു മാസത്തെ അവധി എടുത്ത് നാട്ടിലെത്തുകയായിരുന്നു അദ്ദേഹം.
ഭാര്യ റീന, ആറു വയസ്സുകാരനായ മകൻ റേബൽ, ഒരു മാസം പ്രായമുള്ള മകൾ എന്നിവരടങ്ങുന്ന കുടുംബത്തോടൊപ്പം സമയം ചെലവഴിച്ച ശേഷം വരുന്ന ഞായറാഴ്ച ജർമനിയിലേക്ക് തിരികെ മടങ്ങാൻ നിശ്ചയിച്ചിരിക്കെയാണ് മരണം സംഭവിച്ചത്. നവജാത ശിശുവിനെ കാണാനും കുടുംബത്തോടൊപ്പം സമയം ചെലവഴിക്കാനുമായി എത്തിയ ബിബിന്റെ അപ്രതീക്ഷിത വേർപാട് ബന്ധുക്കൾക്കും സുഹൃത്തുക്കൾക്കും വലിയ ആഘാതമായി.
സംസ്കാരം ചൊവ്വാഴ്ച രാവിലെ 11 മണിക്ക് പുന്നവേലിയിലെ വസതിയിലെ ശുശ്രൂഷകൾക്ക് ശേഷം പുന്നവേലി ലിറ്റിൽ ഫ്ലവർ സിറോ മലബാർ ചർച്ചിൽ നടക്കും.
വാട്സാപ്പ് ചാനൽ സബ്സ്ക്രൈബ് ചെയ്യുക. 
ടെലഗ്രാം ചാനൽ സബ്സ്ക്രൈബ് ചെയ്യുക. 