തിരുവല്ല: തുകലശ്ശേരിയിൽ ഫ്ലാറ്റിലെ ലിഫ്റ്റിൽ കുടുങ്ങിയ പിസ്സ ഡെലിവറി ബോയിയെ അഗ്നിശമന സേന സാഹസികമായി രക്ഷപ്പെടുത്തി. ചൊവ്വാഴ്ച ഉച്ചകഴിഞ്ഞ് മൂന്നരയോടെ തുകലശ്ശേരി ഐക്കര പെനിയൻ ടവറിലായിരുന്നു സംഭവം. വേങ്ങൽ സ്വദേശിയും തിരുവല്ലയിലെ ഡൊമിനോസ് പിസ്സയിലെ ഡെലിവറി ബോയുമായ ശ്രീജിത്താണ് ലിഫ്റ്റിനുള്ളിൽ കുടുങ്ങിയത്.
ഫ്ലാറ്റിലെ താമസക്കാർക്ക് പിസ്സ നൽകാനായി എത്തിയ ശ്രീജിത്ത് ലിഫ്റ്റിൽ കയറി മുകളിലേക്ക് പോകുന്നതിനിടെ സാങ്കേതിക തകരാർ സംഭവിക്കുകയായിരുന്നു. നാലാം നിലയ്ക്കും അഞ്ചാം നിലയ്ക്കും ഇടയിൽ ലിഫ്റ്റ് കുടുങ്ങിയതോടെ ശ്രീജിത്ത് പുറത്തിറങ്ങാനാവാതെ അകപ്പെട്ടു. ഉടൻ തന്നെ ഫ്ലാറ്റ് ഉടമ വിവരം ഫയർഫോഴ്സിനെ അറിയിച്ചു.
തിരുവല്ലയിൽ നിന്നെത്തിയ അഗ്നിശമന സേനാംഗങ്ങൾ ഉടൻ തന്നെ രക്ഷാപ്രവർത്തനം ആരംഭിക്കുകയും വൈകുന്നേരം നാലു മണിയോടെ ലിഫ്റ്റ് തുറന്ന് ശ്രീജിത്തിനെ സുരക്ഷിതമായി പുറത്തെത്തിക്കുകയും ചെയ്തു.
സീനിയർ ഫയർ ആൻഡ് റെസ്ക്യൂ ഓഫീസർമാരായ ആർ.എസ്. ബിനു, സൂരജ് മുരളി എന്നിവരുടെ നേതൃത്വത്തിൽ ഫയർ ഓഫീസർമാരായ സുബിൻ കുമാർ, ആകാശ്, അനിൽകുമാർ, രാഹുൽ എന്നിവരടങ്ങുന്ന സംഘമാണ് രക്ഷാപ്രവർത്തനത്തിൽ പങ്കെടുത്തത്. ഏകദേശം അരമണിക്കൂറോളം നീണ്ട ആശങ്കയ്ക്കൊടുവിലാണ് ശ്രീജിത്തിനെ പുറത്തെത്തിക്കാനായത്.
വാട്സാപ്പ് ചാനൽ സബ്സ്ക്രൈബ് ചെയ്യുക. 
ടെലഗ്രാം ചാനൽ സബ്സ്ക്രൈബ് ചെയ്യുക. 