റാന്നിയിൽ വിവാഹവാഗ്ദാനം നൽകി പീഡിപ്പിച്ചുവെന്ന പരാതിയിൽ സിപിഎം നേതാവിനെതിരെ നടപടിയെടുക്കാതെ പോലീസും പാർട്ടി നേതൃത്വവും കേസ് അട്ടിമറിക്കുന്നതായി ഗുരുതര ആരോപണം. സിപിഎം റാന്നി ഏരിയ കമ്മിറ്റി അംഗമായിരുന്ന അലൻ മാത്യുവിനെതിരായ പീഡന പരാതിയിലാണ് പോലീസിന്റെ ഭാഗത്തുനിന്ന് വീഴ്ചയുണ്ടായതെന്ന് അതിജീവിത ആരോപിച്ചു.
വിവാഹവാഗ്ദാനം നൽകി അലൻ മാത്യു തന്നെ പലതവണ ലൈംഗികമായി ചൂഷണം ചെയ്തതായാണ് യുവതിയുടെ പരാതി. ബന്ധത്തിനിടെ ഗർഭിണിയായ യുവതിക്ക് പാർട്ടിയും അലന്റെ കുടുംബവും വിവാഹത്തിന് ഉറപ്പുനൽകിയിരുന്നു. എന്നാൽ ഗർഭം അലസിയതോടെ പ്രതി വാഗ്ദാനത്തിൽ നിന്ന് പിന്മാറുകയായിരുന്നു.
ജില്ലാ പോലീസ് മേധാവിക്ക് (SP) പരാതി നൽകിയിട്ടും കേസ് രജിസ്റ്റർ ചെയ്യുന്നതിലോ പ്രതിയെ പിടികൂടുന്നതിലോ റാന്നി പോലീസ് കാര്യക്ഷമമായ നടപടി സ്വീകരിച്ചില്ല. രാഷ്ട്രീയ സമ്മർദ്ദത്തിന് വഴങ്ങിയാണ് പോലീസ് അന്വേഷണം മരവിപ്പിച്ചിരിക്കുന്നതെന്ന് അതിജീവിത വാർത്താ സമ്മേളനത്തിലൂടെ അറിയിച്ചു.
നീതി നിഷേധിക്കപ്പെട്ടതിലുള്ള മനോവിഷമത്താൽ യുവതി ആത്മഹത്യയ്ക്ക് ശ്രമിച്ചിരുന്നു. ഇത്രയേറെ ഗൗരവകരമായ സാഹചര്യം ഉണ്ടായിട്ടും പ്രതിയെ ഒളിവിൽ പോകാൻ പോലീസ് സഹായിച്ചുവെന്ന ആക്ഷേപവും ശക്തമാണ്.
സിപിഎം റാന്നി ഏരിയ കമ്മിറ്റി അംഗമായിരുന്ന അലൻ മാത്യു കഴിഞ്ഞ തദ്ദേശ സ്വയംഭരണ തിരഞ്ഞെടുപ്പിൽ പാർട്ടിയുടെ ഔദ്യോഗിക സ്ഥാനാർത്ഥിയായിരുന്നു. രാഷ്ട്രീയ സ്വാധീനം ഉപയോഗിച്ച് കേസ് ഒതുക്കിത്തീർക്കാനാണ് പാർട്ടി തലത്തിൽ ശ്രമം നടക്കുന്നതെന്ന് ആരോപിക്കപ്പെടുന്നു.
വാട്സാപ്പ് ചാനൽ സബ്സ്ക്രൈബ് ചെയ്യുക. 
ടെലഗ്രാം ചാനൽ സബ്സ്ക്രൈബ് ചെയ്യുക. 