കിഫ്ബിയുടെ ചുമതലയിൽ നിർമാണത്തിലിരിക്കുന്ന വാലാങ്കര-അയിരൂർ റോഡിന്റെ മുതുപാലഭാഗത്ത് കൊരുപ്പുകട്ട പാകുന്നതിനും വശംകെട്ടി സംരക്ഷിക്കുന്നതിനും 55 ലക്ഷം രൂപയുടെ പ്രത്യേക അനുമതി ലഭിച്ചതായി അഡ്വ. പ്രമോദ് നാരായൺ എം.എൽ.എ. അറിയിച്ചു. നേരത്തെ റോഡ് നിർമാണം നടത്തിയപ്പോൾ 40 മീറ്ററോളം ഭാഗം ഒന്നുംചെയ്യാതെ കിടക്കുകയായിരുന്നു ഇവിടെയാണ് കട്ട പാകി വശംകെട്ടി സംരക്ഷിക്കുന്നത്.
വാലാങ്കര -അയിരൂർ റോഡ് ബി.എം.ബി.സി. നിലവാരത്തിൽ ടാറിങ് നടത്തിവരികയായിരുന്നു. 24 കോടി രൂപയായിരുന്നു നിർമാണചെലവ്. എന്നാൽ വൈദ്യുത പോസ്റ്റും പൈപ്പും മാറ്റുന്നതിനും സംരക്ഷണഭിത്തി കെട്ടുന്നതിനും മറ്റ് അനുബന്ധ പ്രവൃത്തികൾക്കും ഫണ്ട് തികയാതെ വന്നതോടെ കരാറുകാരൻ പ്രവൃത്തി ഉപേക്ഷിച്ചു. തുടർന്ന് മുടങ്ങിക്കിടന്ന പദ്ധതി പുനരുദ്ധരിക്കുന്നതിന് എം.എൽ.എ.യുടെ ആവശ്യപ്രകാരം 8.73 കോടി രൂപയുടെ എസ്റ്റിമേറ്റ് തയ്യാറാക്കി കെ.ആർ.എഫ്.ബി.യുടെ അനുമതിക്കായി സമർപ്പിച്ചിരിക്കുകയാണ്. ഈ സാഹചര്യത്തിലാണ് മുതുപാല ഭാഗത്ത് വലിയ ഗർത്തം രൂപപ്പെട്ട് യാത്ര ദുഷ്കരമായത്. ഇക്കാര്യം എം.എൽ.എ. കെ.ആർ.എഫ്.ബി. അധികൃതരുടെ ശ്രദ്ധയിൽപ്പെടുത്തിയതോടെയാണ് അടിയന്തരമായി ഇവിടെ 55 കോടി രൂപ അനുവദിച്ചത്.
വാട്സാപ്പ് ചാനൽ സബ്സ്ക്രൈബ് ചെയ്യുക. 
ടെലഗ്രാം ചാനൽ സബ്സ്ക്രൈബ് ചെയ്യുക.