ആനിക്കാട്: ആനിക്കാട് ഗ്രാമപഞ്ചായത്തിലെ ആനിക്കാട് വില്ലേജ് പരിധിയിൽ കാട്ടുപന്നികൾ കൂട്ടത്തോടെയിറങ്ങി വ്യാപകമായി കൃഷി നശിപ്പിച്ചു. രാത്രികാലങ്ങളിൽ കൃഷിയിടങ്ങളിൽ എത്തുന്ന കാട്ടുപന്നിക്കൂട്ടം വിളകൾ ഉഴുതുമറിച്ചതോടെ പ്രദേശത്തെ കർഷകർക്ക് നികത്താനാവാത്ത കനത്ത സാമ്പത്തിക നഷ്ടമാണുണ്ടായിരിക്കുന്നത്.
കഴിഞ്ഞ ദിവസം പ്രദേശത്തെ പുല്ലുകുത്തി, മുട്ടത്തുമാവ് മേഖലകളിലെ കൃഷിയിടങ്ങളിലാണ് കാട്ടുപന്നികൾ വലിയ തോതിൽ നാശം വിതച്ചത്. കർഷരുടെ മാസങ്ങളുടെ അധ്വാനമാണ് ഇതോടെ ഇല്ലാതായത്. സമീപത്തെ പുരയിടങ്ങൾ കൃഷി ചെയ്യാതെ കാടുകയറിക്കിടക്കുന്നത് കാട്ടുപന്നികളുടെ പ്രധാന ആവാസകേന്ദ്രമായി മാറിയിരിക്കുകയാണെന്ന് നാട്ടുകാർ ചൂണ്ടിക്കാട്ടുന്നു.
പകൽസമയങ്ങളിൽ കാടുകളിൽ ഒളിച്ചിരിക്കുന്ന പന്നികൾ രാത്രിയാകുന്നതോടെ കൂട്ടത്തോടെ കൃഷിയിടങ്ങളിലേക്ക് ഇറങ്ങുകയാണ്. നേരത്തെയും പ്രദേശത്തെ കൃഷിയിടങ്ങളിൽ കാട്ടുപന്നികൾ കയറി വിളകൾ നശിപ്പിച്ചിരുന്നെങ്കിലും നാശനഷ്ടങ്ങൾക്ക് കർഷകർക്ക് അർഹമായ നഷ്ടപരിഹാരം ലഭിച്ചില്ലെന്ന് ആക്ഷേപമുണ്ട്.
ബന്ധപ്പെട്ട അധികൃതർ അടിയന്തര നടപടികൾ സ്വീകരിച്ചില്ലെങ്കിൽ കൃഷി പൂർണമായി ഉപേക്ഷിക്കേണ്ടി വരുമെന്ന ആശങ്കയിലാണ് കർഷകർ. തദ്ദേശ ഭരണകൂടം ഇടപെട്ട് കാട്ടുപന്നി ശല്യത്തിന് ശാശ്വത പരിഹാരം കാണണമെന്നും ബാധിക്കപ്പെട്ട കർഷകർക്ക് അടിയന്തര നഷ്ടപരിഹാരം നൽകണമെന്നുമാണ് നാട്ടുകാരുടെ ആവശ്യം.
വാട്സാപ്പ് ചാനൽ സബ്സ്ക്രൈബ് ചെയ്യുക. 
ടെലഗ്രാം ചാനൽ സബ്സ്ക്രൈബ് ചെയ്യുക. 