കാട്ടുപന്നി വാഴത്തോട്ടം നശിപ്പിച്ചു

 ഏത്തവാഴത്തോട്ടത്തിന് ചുറ്റുമുള്ള വേലിക്കടിയിലൂടെ തുരങ്കമുണ്ടാക്കി അകത്തുകടന്ന് കാട്ടുപന്നിക്കൂട്ടം കൃഷിനശിപ്പിച്ചു. എഴുമറ്റൂർ പഞ്ചായത്തിലെ വെണ്ണിക്കുളം ബഥനി ഭാഗത്താണ് കുലച്ചതും അല്ലാത്തതുമായ നൂറിലധികം വാഴകൾ കുത്തിമറിച്ചത്. മിക്കതിന്റെയും മാണവും പിണ്ടിയും വരെ നാര് പരുവത്തിലാക്കിയിട്ടുണ്ട്. 

അരങ്ങത്ത് മാത്യു ജോൺ സ്ഥലം പാട്ടത്തിനെടുത്താണ് എണ്ണൂറോളം വാഴകൾ നട്ടിരുന്നത്. കഴിഞ്ഞ വർഷം ചുഴലിക്കാറ്റിൽ പൂർണമായി കൃഷി നശിച്ചിരുന്നു. പിന്നീട് വെച്ചതാണ് ഇപ്പോൾ പന്നികൾ ഇല്ലാതാക്കിയത്. 15 മൂട് കപ്പയും നഷ്ടപ്പെട്ടു.