റാന്നി സ്വദേശിനിയായ 13 കാരിയുടെ സ്വകാര്യ ചിത്രങ്ങൾ കൈക്കലാക്കി ബ്ലാക്ക്മെയിൽ ചെയ്ത കേസിൽ പ്രതി അറസ്റ്റിൽ. റാന്നി വൈക്കം വിളയിൽ ലക്ഷംവീട്ടിൽ രാജേഷ് കുമാറിനെ (34) യാണ് റാന്നി പൊലീസ് അറസ്റ്റ് ചെയ്തത്.
2025 സെപ്റ്റംബറിലാണ് ഇൻസ്റ്റാഗ്രാം വഴി പെൺകുട്ടിയുമായി പരിചയപ്പെട്ട പ്രതി പിന്നീട് നിരന്തരം ചാറ്റ് ചെയ്യുകയും, ഭീഷണിപ്പെടുത്തി അടിവസ്ത്രം ധരിച്ച ചിത്രങ്ങൾ കൈക്കലാക്കുകയും ചെയ്തത്. തുടർന്ന് കൂടുതൽ നഗ്ന ചിത്രങ്ങൾ അയയ്ക്കാത്ത പക്ഷം അവ സോഷ്യൽ മീഡിയയിൽ പ്രചരിപ്പിക്കുമെന്ന് ഭീഷണിപ്പെടുത്തിയതായും പെൺകുട്ടി മാതാപിതാക്കൾക്ക് വെളിപ്പെടുത്തി. ഇതിനെ തുടർന്ന് റാന്നി പോലീസ് കേസെടുത്ത് അന്വേഷണം ആരംഭിച്ചു.
അന്വേഷണത്തിനിടെ പ്രതി പെൺകുട്ടിയുടെ ചിത്രം പ്രൊഫൈൽ പിക്ചറായി ഉപയോഗിച്ച് വ്യാജ ഇൻസ്റ്റാഗ്രാം അക്കൗണ്ട് സൃഷ്ടിച്ച് വീണ്ടും ബന്ധപ്പെടുകയും ഭീഷണികൾ തുടരുകയും ചെയ്തതായി കണ്ടെത്തി. പത്തനംതിട്ട സൈബർ സെല്ലിന്റെ സഹായത്തോടെ നടത്തിയ അന്വേഷണത്തിൽ പ്രതിയായ റാന്നി വൈക്കം വിളയിൽ ലക്ഷംവീട് സ്വദേശിയായ രാജപ്പന്റെ മകൻ രാജേഷ് കുമാറിനെ പോലീസ് കണ്ടെത്തി അറസ്റ്റ് ചെയ്തു. ഇടുക്കി ജില്ലയിൽ മെക്കാനിക്കായി ജോലി ചെയ്തുവരുന്ന ഇയാൾ വർഷങ്ങളായി വീട്ടിൽ നിന്ന് അകന്ന് കഴിയുകയായിരുന്നുവെന്ന് പോലീസ് അറിയിച്ചു.
സോഷ്യൽ മീഡിയയിൽ സജീവമായ ഒരു യുവാവിന്റെ ചിത്രം പ്രൊഫൈൽ ഫോട്ടോയാക്കി, റീലുകൾ പോസ്റ്റ് ചെയ്തുമാണ് ഇയാൾ പെൺകുട്ടിയെ വിശ്വാസത്തിൽ ആക്കിയത്. പ്രതിയുടെ മൊബൈൽ ഫോണിൽ നിരവധി പെൺകുട്ടികളുടെ ചിത്രങ്ങളും നാല് വ്യാജ ഇൻസ്റ്റാഗ്രാം അക്കൗണ്ടുകളും കണ്ടെത്തിയതായി പോലീസ് പറഞ്ഞു. കൂടുതൽ പെൺകുട്ടികളെ ഇയാൾ സമാനരീതിയിൽ സമീപിച്ചിട്ടുണ്ടോ എന്നതടക്കമുള്ള കാര്യങ്ങളിൽ അന്വേഷണം പുരോഗമിക്കുകയാണ്.
പോലീസ് ഇൻസ്പെക്ടർ പ്രജീഷ് ശശി, എസ്.ഐ സിബി, പോലീസ് ഉദ്യോഗസ്ഥരായ അഭിനന്ത്, ശൈലേന്ദ്രൻ എന്നിവരടങ്ങിയ സംഘമാണ് സൈബർ സെല്ലിന്റെ സഹായത്തോടെ പ്രതിയെ അറസ്റ്റ് ചെയ്തത്. പിന്നീട് കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.
വാട്സാപ്പ് ചാനൽ സബ്സ്ക്രൈബ് ചെയ്യുക. 
ടെലഗ്രാം ചാനൽ സബ്സ്ക്രൈബ് ചെയ്യുക. 